Loading
مساعدة بحـــــث قائمة الاعضاء اشتراك بريدى جديد اليوم التسجيل ملف العضو الرئيسية
اسم العضو: كلمة السر:
حفظ كلمة السر تذكيرك بكلمة السر?


االصحافة
 المنتديات
 صالون الثقافة والادب
 عذب الكلام ( الموضوعات الثقافية والمسابقات )
 رباعيات صلاح جاهين
 اضافة موضوع  الرد على الموضوع
 اطبع الموضوع
|| Bookmark and Share ||
Next Page
الكاتب  الموضوع Next Topic

AhmeD ElfadalY
مصري وأفتخر

Kuwait
14490 مشاركة

كتب فى :  - 14/02/2006 :  17:50:26  Show Profile





الصحافة

السلام عليكم ورحمة الله وبركاته

اخواني الاعزاء

أنفراد تام ومش هيتواجد في اي منتدي تاني أبداً رباعيات صلاح جاهين كل يوم جزءاً

وده اول جزء من هذه الرباعيات

وأتمني تثبيت تلك المشاركه


خرج ابن آدم من العدم قلت : ياه

رجع ابن آدم للعدم قلت : ياه

تراب بيحيا ... وحي بيصير تراب

الأصل هو الموت و الا الحياه ؟

عجبي !!!

ضريح رخام فيه السعيد اندفن

و حفره فيها الشريد من غير كفن

مريت عليهم .. قلت يا للعجب

لاتنين ريحتهم لها نفس العفن

عجبي !!!

ياما صادفت صحاب و ما صاحبتهمش

و كاسات خمور و شراب و ما شربتهمش

أندم علي الفرص اللي انا سبتهم

و الا علي الفرص اللي ما سبتهمش

عجبي !!

و الكون ده كيف موجود من غير حدود

و فيه عقارب ليه و تعابين ودود

عالم مجرب فات و قال سلامات

ده ياما فيه سؤالات من غير ردود

عجبي !!!

أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!!!

يا باب يا مقفول ... إمتي الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي !!!





Edited by - AhmeD ElfadalY on 16/02/2009 11:49:28

هدوء العاصفة
عضو ماسى

Egypt
9568 مشاركة

كتب فى :  - 15/02/2006 :  12:02:15  Show Profile
عجبي علي زمن لسة فيه الجميل جميل

مهما يروح يفضل لسه فيه الروح

ده كان انسان نبضه كله بوح

واحبه من بين البشر ده رورح الروح

ذوقك جميل لما اخترته... هو كان هيروح؟

بس انت حييت تاني اجمل كلام واجمل بوح

صلاح جاهين كان كلمه ومعني

ولو يقدر يجي يشوف ويسمعنا

بنعشقه لسه حتي وهو مش معنا

والفضالي خلدله ذكره في المنتدي وفي حبه جمعنا

احمد الفضالي

بحييك علي اختيارك الجميل

ومجهودك الرائع

اختك هدوء العاصفة

Go to Top of Page

اسلام الرومانسى
عضو ماسى

Italy
44120 مشاركة

كتب فى :  - 15/02/2006 :  16:35:58  Show Profile
تسلم ايدك اخى احمد على كلمك هذا وعلى موضوعك

عن صلاح جاهين كلم جميل اخى احمد

اشكرك من كل قلبى وارجو منك المذيد من موضيعك

اخواك

Go to Top of Page

اليـ واخرة ـل
عضو فعال

Egypt
444 مشاركة

كتب فى :  - 19/02/2006 :  17:03:16  Show Profile
مشكور حبيبى الفضالى
على مواضيع الشيقة الجميلة

وارجو الله داعيا ان يوفقك

اتمنى لك المزيد

تقبل تحياتى

Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 27/02/2006 :  06:05:55  Show Profile
شكركم شباب علي المرور الطيب

واسف علي التأخير

وان شاء الله زي ما وعدتكم هضيف ليكم كل يوم جزء من رباعيات صلاح جاهين

Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 27/02/2006 :  06:15:14  Show Profile
أحب أعيش ولو في الغابات

أصحي كما ولدتني أمي و ابات

طائر .. حوان.. حشرة .. بشر ..بس أعيش

محلا الحياة.. حتي في هيئة نبات

عجبي !!

سهير ليالي و ياما لفيت و طفت

و ف ليه راجع في الضلام قمت شفت

الخوف ... كأنه كلب سد الطريق

و كنت عاوز أقتله .. بس خفت

عجبي !!

كان فيه زمان سحليه طول فرسخين

كهفين عيونها و خشمها بربخين

ماتت لكين الرعب لم عمره مات

مع إنه فات بدل التاريخ تاريخين

عجبي !!

عجبتني كلمة من كلام الورق

النور شرق من بين حروفها و برق

حبيت أشيلها ف قلبي .. قالت حرام

ده أنا كل قلب دخلت فيه اتحرق

عجبي !!!

رقبه قزازة و قلبي فيها انحشر

شربت كاس و اتنين و خامس عشر

صاحبت ناس م الخمرة ترجع وحوش

و صاحبت ناس م الخمرة ترجع بشر

عجبي !!!!

ليه يا حبيبتي ما بيننا دايما سفر

ده البعد ذنب كبير لا يغتفر

ليه يا حبيبتي ما بيننا دايما بحور

أعدي بحر ألاقي غيره اتحفر

عجبي !!!

Go to Top of Page

هدوء العاصفة
عضو ماسى

Egypt
9568 مشاركة

كتب فى :  - 27/02/2006 :  06:52:01  Show Profile
ليه ياحبيبتي دايما مابينا سفر

ليه دايما كده لعبة القـــــــــــــــدر

تبعدنا احنا من بين البشــــــــــــــــر

اشوفك امتي والا برضه قـــــــــــــــــــــدر

وعجبي



الفضالي

برجع احييك تاني علي اختيارك لهذا الشاعر الجميل

وعلي هذه المقطوعة الرائعة

لك مني اجمل تحية وارق الاماني

هدوء العاصفة

Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 28/02/2006 :  05:12:25  Show Profile
ورا كل شباك ألف عين مفتوحين

و انا وانتي ماشيين يا غرامي الحزين

لو التصقنا نموت بضربة حجر

و لو افترقنا نموت متحسرين

عجبي !!!

نوح راح لحاله و الطوفان استمر

مركبنا تايهه لسه مش لاقيه بر

آه م الطوفان وآهين يا بر الأمان

إزاي تبان و الدنيا غرقانه شر

عجبي !!

علي رجلي دم .. نظرت له ما احتملت

علي إيدي دم.. سألت ليه ؟ لم وصلت

علي كتفي دم.. و حتي علي رأسي دم

أنا كلي دم .. قتلت ؟ ..... والا اتقتلت

عجبي !!

انا كل يوم أسمع ........ فلان عذبوه

أسرح في بغداد و الجزاير واتوه

ما أعجبش م اللي يطيق بجسمه العذاب

و اعجب من اللي يطيق يعذب أخوه

عجبي !!!

ينبوع و في الحواديت أنا سمعت عنه

إنه عجيب .. و ف وسط لهاليب لكنه

شقيت كما الفرسان طريقي .. لقيت

حتي الخنازير و الكلاب شربوا منه

عجبي !!!!

يا قرص شمس ما لهش قبة سما

يا ورد من غير أرض شب و نما

يا أي معني جميل سمعنا عليه

الخلق ليه عايشين حياه مؤلمة

عجبي !!!

Go to Top of Page

هدوء العاصفة
عضو ماسى

Egypt
9568 مشاركة

كتب فى :  - 28/02/2006 :  13:05:41  Show Profile
الخلق ليه عايشين حياة مؤلمة
في دنيا كلها الم وناس مؤذية
بيدوروا ع الشر ويجبوه
عشان يموتوا الاخ وابوه
ويفرقوا بين الابن وابوه
ومفيش غير الموت باديهم جابوه

لازم يجلهم فارس يغتلهم
ويشلهم من الدنيا ويعرف مكانهم
ويروح هنا وهناك اقدامهم
ويدفنهم بالحيا المؤلمة

من هدوء العاصفة

Go to Top of Page

الحـ الكبير ـب
عضو ذهبى

Egypt
1369 مشاركة

كتب فى :  - 01/03/2006 :  00:33:05  Show Profile
مشكور احمد على موضوعك الجميل
Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 03/03/2006 :  19:15:18  Show Profile

شاف الطبيب جرحي وصف له الأمل

وعطاني منه مقام يا دوب ما اندمل

مجروح جديد يا طبيب و جرحي لهيب

ودواك فرغ مني .... و إيه العمل

عجبي !!!

أعرف عيون هي الجمال و الحسن

و اعرف عيون تاخد القلوب بالحضن

و عيون مخيفة و قاسية وعيون كتير

وباحس فيهم كلهم بالحزن

عجبي !!

إيش تطلبي يا نفس فوق كل ده

حظك بيضحك و انتي متنكده

ردت قالت لي النفس : قول للبشر

ما يبصوليش بعيون حزينة كده

عجبي !!

إقلع غماك يا تور وارفض تلف

إكسر تروس الساقية و اشتم وتف

قال : بس خطوة كمان .. وخطوة كمان

يا اوصل نهاية السكة يا البير تجف

عجبي !!!

يا حزين يا قمقم تحت بحر الضياع

حزين أنا زيك و إيه مستطاع

الحزن ما بقالهوش جلال يا جدع

الحزن زي البرد ... زي الصداع

عجبي !!!!

في يوم صحيت شاعر براحة و صفا

الهم زال و الحزن راح و اختفي

خدني العجب و سألت روحي سؤال

أنا مت ؟ و لا وصلت للفلسفة

عجبي !!!

Go to Top of Page

الحـ الكبير ـب
عضو ذهبى

Egypt
1369 مشاركة

كتب فى :  - 04/03/2006 :  12:04:27  Show Profile
مشكور احمد على موضوعك
Go to Top of Page

هدوء العاصفة
عضو ماسى

Egypt
9568 مشاركة

كتب فى :  - 04/03/2006 :  23:28:54  Show Profile
الفلسفة هي الحزينة؟؟

والا الحزينــــــة هي الي بتتفلســـــــــــــف

وقدام حزنها عاجــــــــز انا بقف متكتــف

لا بعرف اروح ولا جي منين

حزنها ادامي اهو هو الي بيتفلسف
وعجبي

فلسفة الحزن دي فلسفة

مايعرفها الا الي عاش فيها واكتفي

وكل مرة يقول محزنشي

يحزن برضــــو من قســــوة الجفــــا
وعجبي

احمد الفضالي

بحييك علي امتاعك لينا بروائع هذا الفنان الرائع

لك ارق تحية

هدوء العاصفة

Go to Top of Page

Kapo el3asheq
عضو ماسى

Egypt
7206 مشاركة

كتب فى :  - 05/03/2006 :  21:21:21  Show Profile
جزاك الله كل خير
تحياتى لك
Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 06/03/2006 :  11:29:22  Show Profile
شكرا شباب علي المرور

ادام الله لي هذا التواصل

تقبلوا تحياتي

ahmed elfadaly

Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 06/03/2006 :  11:30:24  Show Profile
الفيلسوف قاعد يفكر سيبوه

لا تعملوه سلطان و لا تصلبوه

ما تعرفوش إن الفلاسفه يا هوه

اللي يقولوه بيرجعوا يكدبوه

عجبي !!!

علي بعد مليون ميل من أرضنا

من الفراغ الكوني بصيت أنا

لا شفت فرق بين جبال و بحور

و لا شفت فرق ما بين عذاب أو هنا

عجبي !!

إنسان أيا إنسان ما أجهلك

ما أتفهك في الكون و ما أضألك

شمس وقمر و سدوم و ملايين نجوم

و فاكرها يا موهوم مخلوقه لك

عجبي !!

نظرت فوق للنجوم و انا ساير

رجليا عترت في الحفر و الحجاير

بقيت أقول و انا ع التراب: يا سلام

مش بس عبره أخذت لكن عباير

عجبي !!!

- يا نجم .. نورك ليه كده بيرتجف ؟

هو انت قنديل زيت ؟ أو تختلف

- أنا نجم عالي .. بس عالي قوي

و كل ما انظر تحت اخاف انحدف

عجبي !!!!

السم لو كان في الدوا منين يضر ؟

و الموت لو عدونا .. منين يسر؟

حط القلم في الحبر و اكتب كمان

.. و العبد للشهوات .. منين هو حر؟

عجبي !!!

Go to Top of Page

كيمو العاشق
عضو ذهبى

Egypt
1578 مشاركة

كتب فى :  - 06/03/2006 :  18:51:19  Show Profile
مشكور اخى الجميل على موضوعك الرائع
تحياتى لك اخوك كيمو
Go to Top of Page

هدوء العاصفة
عضو ماسى

Egypt
9568 مشاركة

كتب فى :  - 07/03/2006 :  02:41:40  Show Profile
والعبد للشهوات منين هو حر

لو يعرف ان نفسه هو بس يضـــــر

لو يعرف ان دي اخرته

كان رجع قبل مايشـــــــــــــرب المــــــر

وعجبي


احمد الفضالي

لك مني ارق تحية

هدوء العاصفة

Go to Top of Page

المصرى مرابطون
عضو ماسى

Egypt
3366 مشاركة

كتب فى :  - 09/03/2006 :  20:04:43  Show Profile
مشكوووووووووووور اخى الغالى على موضوعك الرائع

واتمنى لك دوام التوفيق

وانتظر المزيد

Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 10/03/2006 :  17:47:18  Show Profile
محتار ح اموت .. الحوت خرج لي وقالي

هو الكلام يتقــــــــــــاس بالمســـــــــــطرة

عجبي !!!

سرداب في مستشفي الولاده طويل

صرخات عذاب ورا كل باب وعويل

.. وفي الطــــــريق متزوقين البنات

متزوقـــــــــــــين للحب و المواويل

عجبي !!

الدنيا أوده كـــــــــــبيره للانتظار

فيها ابن أدم زيه زي الحـــــــمار

الهم واحد .. و الملل مشــــــترك

و مفيش حمار بيحاول الانتـــــحار

عجبي !!

أيوب رماه البين بكل العـــــــــلل

سبع سنين مرضان وعنده شلل

الصــــبر طيب .. صبر أيوب شفاه

بس الأكـــــــــاده مات بفعل الملل

عجبي !!!

نسمة ربيع لكن بتكوي الوشـــــــوش

طيور جميلة بس من غير عشـــوش

قلوب بتخفق إنما وحـــــــــــــــــدها

هي الحياه كده .. كلها في الفاشوش

عجبي !!!!

يا طير يا عالي في الســــــما طظ فيك

ما تفتكرشي ربنا مصطــــــــــــــــفيك

برضـــــــــــك بتاكل دود و للطين تعًًًًودً

تمـــــــــص فيه يا حلو .. و يمص فيك

عجبي !!!


Edited by - AhmeD ElfadalY on 10/03/2006 17:47:41
Go to Top of Page

هدوء العاصفة
عضو ماسى

Egypt
9568 مشاركة

كتب فى :  - 10/03/2006 :  19:07:30  Show Profile
عجبي عليك يازمان... بتعلم فينا

احنا الي بنعلم؟؟ والاانت بتعلم فينا

والا بنمحي العلام بخطاوينا

خطأنا....؟ والا خطاوينا؟

احمد الفضالي

تحياتي لك ودمت بخير

هدوء العاصفة

Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 11/03/2006 :  14:54:25  Show Profile
كروان جريح مضروب شعاع م القمر

سقط من السموات فؤاده انكســـــــــر

جريت عليه قطه علشان تبلعـــــــــــه

أتاريه خيال شعراء و مالهـــــوش أثر

عجبي !!!

ياللي نصحت الناس بشــــــــــــــرب النبيت

مع بنت حلوه .. وعود , وضحك , وحديت

مش كنت تنصحهم منين يكســــــــــــــــبوا

تمن ده كله ؟ ... و الا يمكن نســـــــــــيت

عجبي !!

ما حد في الدنيا واخد جزاتــــــــــــــــــه

و لا حــــــــــــــــد بيفكر في غير لذاذاته

ما تعرفيش يا حبيبتي .. أنا و انتي مين؟

إنتي عروس النيل ... و أنا النيل بذاته

عجبي !!

رقاصه خرسا و رقصه من غير نغــم

دنيا . . يا مين يصالحها قبل النـــــدم

ساعتين تهز بوجههـــــــــــــــا يعنـي

يترجرجوا نهديها يعني نعـــــــــــــــم

عجبي !!!

إخطفني ياللي تحبني ع الحصان

الدنيا قالت يوم في ماضي الزمان

إخطفني ياللي تحبني ع الـــــفرس

الدنيا قالت .. قام خطفها الشيطان

عجبي !!!!

من بين شقوق الشيش و شقشقت لك

مع شهقة العصافير و زقزقـــــــت لك

نهار جديد انا . . قوم نشوف نعــمليه

انا قلت يا ح تقتلني .. يا ح اقــــــــتلك

عجبي !!!

Go to Top of Page

هدوء العاصفة
عضو ماسى

Egypt
9568 مشاركة

كتب فى :  - 13/03/2006 :  05:44:43  Show Profile
تعمل عمايل ماتتعملش

بس ترجع تاني ماتتكلمش

لما تتسأل حصل ايه

حكايات اتحكت وتانية ماتحكتش

الفضالي

لك تحياتي

هدوء العاصفة

Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 14/03/2006 :  03:31:12  Show Profile
جالك أوان ووقفت موقف وجـــود

يا تجود بده يا قلبي يا بده تجــــود

ما حد يقدر يبقي علي كل شـــــــئ

مع إن – عجبي – كل شئ موجود

عجبي !!!

جالك اوان وعرفت مشي الجنايــــــــز

كيف شفتها يا عبد رب اللذايــــــــــــذ

قال : شفت شيل بالحيل فقير أو اميـــر

كما شالوا في الخمامير فواضي القزايز

عجبي !!

أنا كنت شئ و صبحت شئ ثم شــئ

شوف ربنا .. قادرعلي كل شـــــــئ

هز الشجر شواشيه ووشوشني قال :

لابد ما يموت شئ عشان يحيا شئ

عجبي !!

يا مشرط الجراح أمانة علـــــــــــيك

و انت ف حشايا تبص من حواليــك

فيه نقطة سوده في قلبي بدأت تبان

شيلها كمان .. و الفضل يرجع إليك

عجبي !!!

كيف شفت قلبي و النبي يا طبيــــــــــــب

همد و مات و الا سامع له دبيـــــــــــــب

قاللي لقيته مختنق بالدمـــــــــــــــــــــوع

و ما لوش دوا غير لمسه من إيد حبيب

عجبي !!!!

تسلم يا غصن الخوخ يا عود الحطـــــــــب

بييجي الربيع .. تطلـــــــــــع زهورك عجب

و انا ليه بيمضـــــــــــي ربيع وييجي ربيع

و لسه برضك قلــــــــــــــــــبي حتة خشب

عجبي !!!

Go to Top of Page

AhmeD ElfadalY
مصري وأفتخر

Kuwait
14490 مشاركة

كتب فى :  - 18/03/2006 :  07:34:25  Show Profile
قلبي عليل يا ناس و في الكاس دواه

مديت له إيدي شربت م اللي حــــواه

جنبي الشمال خف .. اليمين اتــــوجع

و إيه يداوي الكبد م اللي كـــــــــــواه

عجبي!!

.. دي مزكرات و كتبتها من ســـــــــنين

في نوتة زرقا لون بحور الحنيــــــــــــن

عترت فيها .. رميتها في المهمـــــــلات

وقلت صحيح أما صحيح كلام مخبولين

عجبي !!

دخل الشتا وقفل البيبان ع البـــيوت

وجعل شعاع الشمس خيط عنكبوت

وحاجات كتير بتموت في ليل الشــتا

لكن حاجات أكتر بترفض تمــــــوت

عجبي !!

- الدنيا من غير الربيع مــــــــيته

ورقة شجر ضعفـــــــانه و مـــفـــــتــته

- لا يا جدع غلطان تأمل وشوف

زهر الشتا طالع فــــــــي عز الشـــــتا

عجبي !!!

ياللي انت بيتك قش مفروش بريش

تقوي عليه الريح .. يصبح ما فيش

عجبي عليك حواليك مخالب كـــــبار

و ما لكش غير منقار و قادر تعيش

عجبي !!!!

سمعت نقطة ميه جوه المحيـــــــط

بتقول لنقطه ما تنزليش في الغويط

أخاف عليكي م الغرق .. قلـــــت أنا

ده اللي يخاف م الوعد يبقي عبيط

عجبي !!!

Go to Top of Page

LION SHOBIK
عضو ذهبى

Egypt
1680 مشاركة

كتب فى :  - 18/03/2006 :  09:04:19  Show Profile
تسلم ايديك احمد
موضوع جميل
اتمنى لك التوفيق
اخوك:سمسوم
Go to Top of Page
 الموضوع Next Topic  
صفحة تالية
 اضافة موضوع  الرد على الموضوع
 اطبع الموضوع
|| Bookmark and Share ||
أذهب الى:
 

منتديات || دردشة || احدث الاخبار || الرياضة اليوم ||مجلة زووم || عالم المرأة || المطبخ العربى || للكبار فقط

دنيا ودين || القرأن الكريم || عمرو خالد || دليل المواقع || خدمات الموقع || خدمات حكومية || المراسلة وابلاغ انتهاك

|| Bookmark and Share